**** نصر السويس ****

من طرف **جمال عمران** السبت ديسمبر 25, 2010 6:04 pm

عن ذكرى 24 اكتوبر المجيدة
*****
زى النهاردة من زمان
كنت انا برضه هنا
وكنت باضْرب ع القفا
كل إللى مس أرضنا ..
****
نَفَشْ ريشه وخَشْ البلد
( غِلِط اللئيم )
كان فاكر إن السِكة ورد
( طِلِع بِهيم )
****
خَدْ ع القفا من جندى
كان قاعد هنا
ومقاومة جَمَعْها الجهاد
فدا أرضنا ..
****
من مسجد الشهدا الجهاد
والقلوب إتوحدِت
والإيدين مسكت إيدين
والمقاومة إتشدِدِت ..
****
صبحت معداته وجنوده
مبعترة
والسويس صبحت لجيشه
مقبرة
****
رفع الحمار علم أبيض
وقال توبة
جت أم خميس
راحت ضارباه بزنوبة
****
والأسرى وقفوا
والإيدين مربوطة
ولفرحة نصر السويس
كانت أحلى زغروطة ..
****
أم خميس : هى إحدى النساء اللائى شاركن فى المقاومة فكان العدو لا يفطن إليهن ..
زنوبة : حذاء حريمى ( شبشب )
***********
____________