**** عايش وخلاص ****

**** عايش وخلاص ****

--------------------------------------------------------------------------------

لا باعرف أقول كلام غَزَلْ ..
ولا افهم فى الرومانسية ..
وحياتى شقا ودموع..
ودنيا الحُب مِش لية ..
مافيش فرحة تزورنى فى يوم ..
ولا نِسْمة معدية ..
****
ما باعرفشى فى فن الحُب ..
ولا باعرف فى بحرُه كلام ..
ولا باعرف أقول أشعار..
ولا اعزف للعيون أنغام ..
ولا باعرف أناجى طيف ..
ولا باعرف أعيش أحلام ..
****
لا باقول ع الخدود تفاح ..
والقََدْ غزال بيتمختر ..
ولا عن رمش شَغَل البال ..
وخلا الفكر يتبعتر ..
ولا عن وِشْ زى البدر..
بخَد النسمة مِتعَطرْ ..
****
لا باعرف اقول عن الخَطْوة ..
ولا عن رنة الخلخال ..
ولا بافهم فى تنهيدة ..
ولا نظرة وراها سؤال ..
ولا فى نعومة ولا رِقة ..
ولا تلميح بتِيه ودلال ..
****
ماجربْتِش فى يوم فُسْحة ..
ولا تمشية ع الكورنيش ..
ولا مسكتش فى إيد مُزَة ..
ولا اهديتها مروحة ريش ..
ولا مَرَة لقيت نفسى ..
زَىْ خلْق الله باعيش ..
****
وتسألنى يا صاحبى ليه ؟ ..
أقولك ع اللى جوايا ..
حياتى هىَ لقمة عيش ..
وسعيى هو دنيايا ..
ولقمة حلال تكفينى ..
وتِبْقى سَتْرى وغطايا ..
****
والاقينى باشيل الهم ..
ياصاحبى عشان قُوتى ..
وأدوُر فى ساقية زى التور ..
وراضى بصبرى وسكوتى ..
ولو مَرَة أفكر أحبْ ..
أبقى نويت على موتى ..
****
أنا إنسان لكن مطحون ..
واخدنى الكدح فى العيشة ..
وحدودى فى لقمة وهِدْمة ..
وأتكوم على خيشة ..
ولو أبقشش أو أتبغدِدْ ..
باشربلى حَجَرْ شيشة ..
****
أتمنى ياصاحبى تكون فِهِمْت ..
إن الدنيا دى نُصِين ..
نص يحب أو يتحب مِتهَنى ..
ونُصْ بيشقى ويا البينْ ..
ونُصْ السعد من توبه ..
ونُصْ يلازمه دمع العين ..
******
* جمال *

السيدة المدير العام
سعدنى ردك وثناؤك على ماكتبت ..
دام مرورك الكريم