*** هنا كوكتيل ***

هنا كوكتيل
تعالى ادخل ف دنيتنا تلاقى كتير
تلاقى البسمه والفرحه
عروسه وماشيه بالطرحه
تغنى ياليل
هنا كوكتيل
تعالى ادخل ف دنيتنا تلاقى كتير
تلاقى الحزن مترصص بكام طوابير
عذاب ساخر
وليل اسود
مالوووووووووووووش اخر
عِشش وبشر بتتاخر
لا هِدمه
لا لُقمه
لا مأوى
ولا مسئول عن السائل
هنا كوكتيل
تعالى ادخل ف دنيتنا تلاقى كتير
تلاقى ناس على قلوب العباد قاعدين
ضميرهم مات وفاكرين إنهم صالحين
رفعنا الصوت وقلنا خلاص
زهقنا ياناس ومش عايزين
ولا هما لنا سامعين
سقونا الويل
وبيقولوا اننا تركة
ميراث ليهم
وجابوا دليل
هنا كوكتيل
تعالى ادخل ف دنيتنا تلاقى كتير
تلاقى بدل وكَرَفتات
وناس فوق فوق قوى بهوات
تقدم للبنوك خطة
عشان تخبط لها الخبطة
وتتقسم كمان منابات
وشاطر يا اللى بتهلب
وضايع يا اللى يوم عندك
بواقى ضمير
هنا كوكتيل
تعالى ادخل ف دنيتنا تلاقى كتير
تلاقى ناس رجال اعمال
هجوم كاسح كأنه تتار
فى احضانهم بلد وقعت
وقاسوا الارض بالقنطار
شروها بابخس الاسعار
باعوها للغلابه نار
وبيسموه قال استثمار
وماشيه الخلق بالمندار
بتتخبط ماليها دليل
هنا كوكتيل
تعالى ادخل ف دنيتنا تلاقى كتير
واكتر من كده بكتير
ف ارض النيل
هنا كوكتيل
****جمعه محمد ****

الاستاذ جمعه محمد
موضوع مهم لكن يتبقى ان تكون الخاتمة كما ينبغى ..
ننتظر البقية .. وانا بصفة خاصة انتظر معانى اعمق تأثيراً وكلمات اروع انتقاءً ..
شكرا لك