ثورة مصر وحرس القصر

***ثورة مصر وحرس القصر***
ـــــــــــــــــــــــــــــــــــــــــــــــــــــــــــــــــــــــــــــــ
ياخوفي عليكى ياثورة مصر
من حرس القصر
من وجع العصر
ومن التعابين الخارجين
من تلابيب الحاوي
من مليون جحر وجحر
ولاليها مثيل فى المكر
ولاليهم حصر
ولاهى بتعرف رحمة
ولاتقدر ولاتفهم ولاتنطق إلا
كلمة هُس!
يعنى اخرس
إسكت خالص
شكلك ثاير على نفسك!
وطول مناخيرك بيأكدإنك
إما عميل أو "جرابيل" ولا اجندة
أو عيّل مندس
وعلو حسّك على نفسك
يانن عين ورووح أمك!
مش على حكام مصر
وان كنت مهيّس
وفاكر إنك مع زملاتك
شيلتوا الريس!
تبقى عبيط
وهما أكيد أعبط منك
لولا وجودنا فى الميدان
ماكانشى شىء أبدا كان
ولاكانت ثورة ولادياولو
لو عشتوا طول العمر تحاولوا
لولا احنا لكانت محنة
ولاكان الريس يتنحى
وانتوا نجحتوا وفرحتوا
عشان احنا كنا معاكوا
أيدناكوا وطمناكوا وأمّناكوا
ولولانا ماكانت ثورة من الأصل
كانت زى مظاهرة وتخلص
إسكت خالص إخرس
لولا العسكر
كانت تخسر
كانت تُقهر
كانت تخلص
ولاكانت ثورة خمسة وعشرين
فى شهر يناير
لكن كانت ح تكون
يوم تلاتين فبراير!
فى سنة مش م السنين!
لأ لأ ياسيادة المشير
إحنا مش مهيسين
ولا أجندة أو جرابيل
إحنا اللى عملنا ثورتنا
بفضل رب العالمين
إحنا اللى أدهشنا العالم
احنا اللى وصلنا بيوتنا مع غنوتنا
باب باب شباك شباك
على ميدان التحرير
إيد فى الإيد
ونشيد فى نشيد
وضمير فى ضمير
ناقشين عليهم رسالتنا
شهداء للحرية
لعدالة إجتماعية
شهداء للتغيير
لأ لأ ياسيادة المشير
بكفاية خداع ومغالطات
وتشويه فى الحقيقة
والتعلب لما فات
بديله عمل حاجات
ضد الثورة البريئة
المدهشة الجريئة
والثورة مستمرة
مالهاش خطوط حمرا
وانتوا الثورة المضادة
وكلنا عارفين
"وإن عدتم عدنا"
للحرية
للتغيير
(لميدان التحرير)



نوفمبر 2011

[b]قالوا ثورة
رحنا جرى علاميدان
حطينا روحنا فى الميزان
لجل ما ننعم براحة
لجل ما نمحى الخرافة
إللى كانت كتمة فينا كل صرخة
إللى كانت واخدة منا حريتنا
لكن ياخسارة
بعد ما دم الشهيد روى الميدان
وكل شارع فى المكان
لسة برضة فية حكاية
كلماتك الجميلة حكت الحكاية ونورتنا
وعرفتنا اللى بيحصل